ਤਰਕਸ਼ੀਲ ਸੁਸਾਇਟੀ ਪੰਜਾਬ ਦੀ ਇਕਈ ਮੁਹਾਲੀ ਵੱਲੋਂ ਪੁਸਤਕ ਰਿਲੀਜ
ਫਲਸਫਾ, ਧਰਮ, ਸਾਇੰਸ, ਤਕਨੀਕ ਤੇ ਸੱਭਿਆਚਾਰ ਦੇ ਇਤਿਹਾਸਿਕ-ਮਿਥਿਹਾਸਿਕ ਪੱਖਾਂ 'ਤੇ ਹੋਈ ਵਿਚਾਰ-ਚਰਚਾ
ਐਸ. ਏ. ਐਸ. ਨਗਰ, 14 ਦਸੰਬਰ (ਜਰਨੈਲ ਕ੍ਰਾਂਤੀ): ਤਰਕਸ਼ੀਲ ਸੁਸਾਇਟੀ ਪੰਜਾਬ ਦੀ ਇਕਾਈ ਮੋਹਾਲੀ ਦੀ ਮਹੀਨਾਵਾਰ ਮੀਟਿੰਗ ਵਿੱਚ ਅੱਜ ਸੁਸਾਇਟੀ ਵੱਲੋਂ ਪ੍ਰਕਾਸ਼ਿਤ ‘ਪੁਸਤਕ ਸੱਭਿਆਚਾਰ ਕੀ ਹੋਵੇ?’ ਰਿਲੀਜ ਕੀਤੀ ਗਈ. ਪੁਸਤਕ ਨੂੰ ਦੋ ਭਾਗਾਂ ਵਿੱਚ ਵੰਡਿਆ ਗਿਆ ਹੈ. ਪਹਿਲੇ ਭਾਗ ਵਿੱਚ ਸੱਭਿਆਚਾਰ ਦੇ ਸਾਰੇ ਪੱਖਾਂ ਜਿਵੇਂ
ਫਲਸਫਾ, ਧਰਮ, ਸਾਇੰਸ, ਤਕਨੀਕ, ਸੱਭਿਆਚਾਰ ਦੇ ਇਤਿਹਾਸਿਕ ਤੇ ਮਿਥਿਹਾਸਿਕ ਪੱਖਾਂ ਨੂੰ ਵਿਸਥਾਰ ਪੂਰਵਕ ਵਿਚਾਰਿਆ ਗਿਆ ਹੈ. ਦੂਜੇ ਭਾਗ ਵਿੱਚ ਤਰਕਸ਼ੀਲ
ਸੁਸਾਇਟੀ ਪੰਜਾਬ ਦੀ ਸੱਭਿਆਚਾਰ ਬਾਰੇ ਨੀਤੀ ਦੀ ਵਿਆਖਿਆ ਕੀਤੀ ਗਈ ਹੈ. ਮੀਟਿੰਗ ਵਿੱਚ ਇਕਾਈ ਮੈਂਬਰਾਂ ਵੱਲੋਂ ਕਿਤਾਬ 'ਤੇ ਵਿਸਥਾਰ ਪੂਰਵਕ ਵਿਚਾਰ ਵਟਾਂਦਰਾ ਕੀਤਾ ਗਿਆ.
ਇਸ ਦੌਰਾਨ ਵਿਸ਼ੇਸ਼ ਤੌਰ 'ਤੇ ਪੁੱਜੇ ਸੁਸਾਇਟੀ ਦੇ ਚੰਡੀਗੜ੍ਹ ਜੋਨ ਦੇ ਜਥੇਬੰਦਕ ਮੁਖੀ ਲੈਕਚਰਾਰ ਗੁਰਮੀਤ ਖਰੜ ਨੇ ਵਿਚਾਰ ਚਰਚਾ ਦਾ ਆਰੰਭ ਕਰਦਿਆਂ ਕਿਹਾ ਕਿ ਅਸੀਂ ਪਦਾਰਥਵਾਦੀ ਵਿਚਾਰਧਾਰਾ ਦੇ ਵਿਰੋਧ 'ਚ ਜਾਂਦੀਆਂ ਸਾਰੀਆਂ ਵਿਚਾਰਧਾਰਾਵਾਂ ਦਾ ਵਿਰੋਧ ਕਰਾਂਗੇ. ਉਹਨਾਂ ਧਰਮ ਬਾਰੇ ਬੋਲਦਿਆਂ ਕਿਹਾ ਕਿ ਸੁਸਾਇਟੀ ਧਰਮ ਦਾ ਰਾਜ ਅੰਦਰ ਤੇ ਰਾਜ ਦਾ ਧਰਮ ਵਿੱਚ ਦਖਲ ਦਾ ਵਿਰੋਧ ਕਰਦੀ ਹੈ ਤੇ ਧਰਮ ਨਿਰਪੇਖ ਰਾਜ ਦੀ ਮੰਗ ਉਠਾਉਂਦੀ ਹੈ. ਉਹਨਾਂ ਕਿਹਾ ਕਿ ਸੁਸਾਇਟੀ ਜਾਤੀਪ੍ਰਥਾ ਦਾ ਵਿਰੋਧ ਕਰਦੀ ਹੈ ਤੇ ਸੁਸਾਇਟੀ ਮੈਂਬਰ ਅੰਤਰਜਾਤੀ ਵਿਆਹ ਕਰਵਾਉਣ ਵੱਲ ਉਚੇਚੇ ਕਦਮ ਚੁੱਕਣਗੇ.
ਵਿਚਾਰ ਚਰਚਾ ਦੌਰਾਨ ਸੰਬੋਧਨ ਕਰਦਿਆਂ ਤਰਕਸ਼ੀਲ ਆਗੂ ਜਰਨੈਲ ਕ੍ਰਾਂਤੀ ਨੇ ਕਿਹਾ ਕਿ ਸੁਸਾਇਟੀ ਸਾਇੰਸ ਤੇ ਤਕਨਾਲੋਜੀ ਦੀ ਤਰੱਕੀ ਨੂੰ ਸਲਾਮ ਕਰਦੀ ਹੈ ਪਰ ਇਸ ਦੀ ਦੁਰਵਰਤੋਂ ਦਾ ਵਿਰੋਧ ਕਰਦੀ ਹੈ. ਉਹਨਾਂ ਕਿਹਾ ਕਿ ਤਰਕਸ਼ੀਲ ਸੁਸਾਇਟੀ ਹਕੂਮਤਾਂ ਦੀ ਹੈਸੀਅਤ ਪ੍ਰਤੀਕਵਾਦ ਵਾਲੀ ਸੱਭਿਆਚਾਰਕ ਨੀਤੀ ਦਾ ਵਿਰੋਧ ਕਰਦੀ ਹੈ ਤੇ ਆਪਣੇ ਆਪ ਨੂੰ ਇਸ ਦਾ ਸ਼ਿਕਾਰ ਨਹੀਂ ਹੋਣ ਦੇਵੇਗੀ.
ਤਰਕਸ਼ੀਲ ਮੈਗਜੀਨ ਦੇ ਸਹਿ ਸੰਪਾਦਕ ਜਸਵੰਤ ਮੋਹਾਲੀ ਨੇ ਔਰਤਾਂ ਦੇ ਹੱਕਾਂ ਸੰਬੰਧੀ ਸੁਸਾਇਟੀ ਦੀ ਨੀਤੀ ਦੀ ਵਿਆਖਿਆ ਕੀਤੀ. ਉਹਨਾਂ ਕਿਹਾ ਕਿ ਸੁਸਾਇਟੀ, ਔਰਤਾਂ ਦੇ ਜਾਇਦਾਦ ਵਿੱਚ ਬਰਾਬਰ ਅਧਿਕਾਰਾਂ, ਵੇਸਵਾਗਮਨੀ 'ਤੇ ਰੋਕ ਤੇ ਇਸ ਧੰਦੇ ਵਿੱਚ ਧੱਕੀਆਂ ਔਰਤਾਂ ਦੇ ਸਮਾਜਿਕ ਸਨਮਾਨ ਤਹਿਤ ਮੁੜ ਵਸੇਬੇ ਦੇ ਹੱਕ ਵਿੱਚ ਹੈ. ਉਹਨਾਂ ਕਿਹਾ ਕਿ ਸੁਸਾਇਟੀ ਇਹ ਸਮਝਦੀ ਹੈ ਕਿ ਮੀਡੀਆ ਦੇ ਸਾਧਨਾਂ ਵਿੱਚ ਔਰਤਾਂ ਦੇ ਜਿਣਸੀਕਰਨ ਦਾ ਖਾਤਮਾ ਹੋਣਾ ਚਾਹੀਦਾ ਹੈ ਤੇ ਖਾਪ ਪੰਚਾਇਤਾਂ ਦੇ ਪਿਛਾਖੜੀ ਤੇ ਬਰਬਰਤਾ ਵਾਲੇ ਫੈਸਲਿਆਂ ਦਾ ਵਿਰੋਧ ਕਰਦੀ ਹੈ. ਉਹਨਾਂ ਬੋਲਦਿਆਂ ਕਿਹਾ ਕਿ ਤਰਕਸ਼ੀਲ ਸੁਸਾਇਟੀ ਔਰਤਾਂ ਨਾਲ ਜਾਤੀ ਅਤੇ ਧਰਮ ਦੇ ਨਾਂ 'ਤੇ ਹੋਣ ਵਾਲੇ ਭੇਦਭਾਵਾਂ ਦਾ ਵੀ ਵਿਰੋਧ ਕਰਦੀ ਹੈ. ਕਿਰਤ ਸੱਭਿਆਚਾਰ ਬਾਰੇ ਬੋਲਦਿਆਂ ਇਕਾਈ ਮੁਖੀ ਮਾਸਟਰ ਸੁਰਜੀਤ ਨੇ ਕਿਹਾ ਕਿ ਲੋਕਾਂ ਨੂੰ ਕੰਮ ਕਰਨ ਦੇ ਨਾਲ-ਨਾਲ ਕੀਤੇ ਕੰਮ ਦਾ ਪੂਰਾ ਫਲ ਹਾਸਲ ਕਰਨ ਲਈ ਜੱਦੋ-ਜਹਿਦ ਦੇ ਰਾਹ ਵੀ ਪੈਣਾ ਚਾਹੀਦਾ ਹੈ. ਇਕਾਈ ਮੋਹਾਲੀ ਦੇ ਸੱਭਿਆਚਾਰ ਵਿਭਾਗ ਦੇ ਮੁਖੀ ਗੋਰਾ ਹੁਸ਼ਿਆਰਪੁਰੀ ਨੇ ਕਿਹਾ ਕਿ ਸੁਸਾਇਟੀ ਦੀ ਸਮਝ ਮੁਤਾਬਕ ਤਰਕਸ਼ੀਲ ਕਾਮੇ ਰਸਮੋਂ-ਰਿਵਾਜਾਂ ਚੋਂ ਜੋ ਵੀ ਛੱਡ ਸਕਦੇ ਹੋਣ ਛੱਡਣਗੇ. ਜੋ ਹੁਣ ਦੀਆਂ ਹਾਲਤਾਂ ਮੁਤਾਬਕ ਛੱਡਣੇ ਸੰਭਵ ਨਹੀਂ ਉਹ ਨਿਭਾਉਣਗੇ. ਨਾ ਬਾਗੀ ਬਣਨਗੇ ਤੇ ਨਾ ਸਮਾਜਿਕ ਦਬਾਅ ਦੇ ਜੂਲੇ ਹੇਠ ਕੁਰਾਹੁੰਦੇ ਰਹਾਂਗੇ.
